Алдағы Құрылтай сайлауына қатысатын саяси партиялар Павлодар облысында үгіт-насихат жұмыстарын жалғастыруда. Кезекті жұмыс күнінде партия өкілдері өндіріс орындарында, ауылдық елді мекендерде, еңбек ұжымдарында және тұрғындар арасында кездесулер өткізіп, сайлауалды бағдарламаларының негізгі бағыттарын таныстырды. Төменде жеті партияның өңірдегі бір күндік жұмысы ақпараттық сипатта берілді.
«Әділет» партиясы
Павлодар облыстық «Әділет» партиясының сайлауалды штабының ақпараттық-насихаттық топтары Павлодар, Екібастұз қалаларында, Ақтоғай, Ертіс және Тереңкөл аудандарында үгіт-насихат жұмыстарын жүргізді. Кездесулер өндірістік кәсіпорындарды, ауыл шаруашылығы нысандарын және елді мекен тұрғындарын қамтыды.
Павлодар қаласында партия өкілдері «Қазақстан алюминийі» АҚ еңбек ұжымымен кездесті. Жиында экономика, өнеркәсіп, әлеуметтік сала және еңбек адамдарының күнделікті өміріне қатысты мәселелер талқыланды. Тереңкөл ауданында Ивановка ауылының тұрғындарымен және «Fil-Mark» ЖШС қызметкерлерімен кездесу өтіп, Тереңкөл мен Ивановка ауылдарында «Есіктен есікке» акциясы ұйымдастырылды.
Ақтоғай ауданында «Agro-Terra» ЖШС қызметкерлерімен, Ертіс өзенінің жайылмасындағы шөп шабу бригадаларымен және Басқамыс ауылындағы «Аширбеков» шаруа қожалығы өкілдерімен кездесулер өтті. Бірқатар жиындар еңбек ұжымдарының тікелей жұмыс орнында, еркін форматта ұйымдастырылды.
Павлодар қаласының орталығында «Әділетті Қазақстан үшін — біз біргеміз» атты жария акция да өтті. Оған түрлі мамандық иелері, қоғамдық белсенділер және партия жақтастары қатысты. Күн соңында Айжан Аймағанова мен Мәди Мырзағараев Jibek Joly телеарнасындағы ұлттық теледебатқа қатысып, заң және тәртіп, елдің дамуы мен болашағына қатысты партияның ұстанымдарын таныстырды.
Жалпыұлттық социал-демократиялық партия (ЖСДП)
Жалпыұлттық социал-демократиялық партияның Павлодар облысындағы үгіт-насихат жұмыстары елді мекен тұрғындарымен тікелей кездесулер өткізу арқылы жалғасты. Қазақстан Республикасы Құрылтайының депутаттығына кандидат Роза Джусупова Теміржолшылар және Жетекші ауылдарына барып, тұрғындар арасында ақпараттық-түсіндіру жұмыстарын жүргізді.
Сапар барысында партияның сайлауалды бағдарламасының негізгі бағыттары таныстырылып, ЖСДП-ның елдің әлеуметтік-экономикалық дамуына қатысты ұсыныстары түсіндірілді. Партия белсенділері тұрғындарға ақпараттық брошюралар таратып, үгіт материалдарын арнайы рұқсат етілген орындарға орналастырды.
Тұрғындармен кездесуде алдағы сайлаудың маңызы, азаматтардың саяси науқанға қатысуы және партияның бағдарламалық ұстанымдары жөнінде ақпарат берілді. Партия өкілдері сайлаушыларға өз бастамаларын түсіндірумен қатар, тұрғындардың пікірлерін тыңдауға және олардың сұрақтарына жауап беруге назар аударды.
ЖСДП үшін елді мекендерді аралап, азаматтармен тікелей байланыс орнату үгіт науқанының негізгі бағыттарының бірі болып отыр. Осы мақсатта партия өкілдері облыс аумағындағы ауылдар мен тұрғын аудандарда кездесулер ұйымдастырып, сайлауалды бағдарламаның мазмұнын сайлаушыларға жеткізуді жалғастыруда.
«Байтақ» партиясы
Павлодар облыстық «Байтақ» партиясы филиалы сайлауалды кезеңде тұрғындармен өзара байланысты нығайтуға және партияның экологиялық күн тәртібін түсіндіруге бағытталған жұмыстарын жалғастырды. Негізгі назар қала тұрғындарымен кездесуге, олардың пікірлерін тыңдауға және сайлауалды бағдарламаның басты бағыттарын таныстыруға аударылды.
Партия белсенділері тұрғындармен әңгімелесіп, партияның қызметі, алға қойған міндеттері және өңірдің дамуына қатысты ұстанымдары жөнінде ақпарат берді. Кездесулер барысында азаматтарға өздерін қызықтырған мәселелер бойынша сұрақ қоюға, ұсыныстарын білдіруге және қала мен облыстың болашағына қатысты пікірлерін жеткізуге мүмкіндік берілді.
Үгіт-насихат жұмыстарының негізгі тақырыптарының бірі экология және қоршаған ортаны қорғау болды. Партия өкілдері экологиялық қауіпсіздік, табиғи ресурстарға ұқыпты қарау, елді мекендердің тазалығын сақтау және тұрғындардың экологиялық мәдениетін арттыру мәселелерін көтерді.
Партия филиалының өкілдері халықпен ашық диалог жүргізуді және қоршаған ортаны қорғауға қатысты мәселелерді қоғамдық талқылауға шығаруды маңызды бағыттардың бірі ретінде қарастырып отыр. Осы арқылы «Байтақ» партиясы тұрғындарды сайлауалды бағдарламасының экологиялық басымдықтарымен таныстырып, олардың ұсыныстары мен пікірлерін жинақтауға көңіл бөлді.
Қазақстан Халық партиясы (ҚХП)
Қазақстан Халық партиясының Павлодар облысындағы кезекті сайлауалды кездесуі аға буын өкілдерімен өтті. Қазақстан Республикасы Құрылтайының депутаттығына кандидаттар Әлімбек Ағибаев пен Евгений Миронов Павлодар қалалық соғыс және еңбек ардагерлері кеңесінің белсенділерімен жүздесті.
Кездесу барысында көп жылдық еңбегімен Павлодар қаласының қалыптасуы мен дамуына үлес қосқан ардагерлердің өмірлік тәжірибесіне, пікірлері мен ұсыныстарына ерекше назар аударылды. Қатысушылар қала мен облыстың әлеуметтік-экономикалық дамуы, аға буынды қолдау және қоғамдағы өзекті мәселелер төңірегінде пікір алмасты.
Ардагерлер өздерін толғандыратын мәселелерді ортаға салып, кандидаттарға ұсыныстары мен аманаттарын жеткізді. Партия өкілдері олардың сұрақтарына жауап беріп, айтылған пікірлердің алдағы жұмыста ескерілуі үшін қабылданғанын жеткізді.
Кездесудің негізгі мазмұны аға ұрпақтың қоғамдық өмірдегі орны мен олардың тәжірибесін бағалауға арналды. ҚХП өкілдері еңбек ардагерлерімен тікелей пікір алмасуды сайлауалды науқан аясындағы қоғамдық диалогтың маңызды бөлігі ретінде қарастырып, олардың ұсыныстарын тыңдауға басымдық берді.
«Ауыл» партиясы
«Ауыл» партиясының Павлодар облысындағы сайлауалды штабы ауылдық елді мекен тұрғындарымен кездесулер өткізді. Кезекті үгіт-насихат жұмыстары Успен ауданындағы Таволжан және Павлодар ауданындағы Ефремовка ауылдарын қамтып, ауыл тұрғындарының күнделікті тұрмысына қатысты мәселелерді талқылауға арналды.
Таволжан ауылындағы кездесуде ауылдық аумақтарды дамыту, инфрақұрылымды жақсарту, тұрғындарды жұмыспен қамту және әлеуметтік қолдау мәселелері көтерілді. Ауыл азаматтары өздерін толғандырған түйткілдерді ашық айтып, елді мекеннің болашағына қатысты ұсыныстары мен пікірлерін білдірді. Штаб өкілдері партияның сайлауалды бағдарламасының негізгі бағыттарын таныстырды.
Ефремовка ауылында да ашық форматтағы кездесу өтті. Мұнда елді мекеннің әлеуметтік-экономикалық даму перспективалары, инфрақұрылым, жұмыспен қамту және халықтың әл-ауқатын арттыру мәселелері талқыланды.
Екі ауылдағы кездесулер барысында партия өкілдері тұрғындардың ұсыныстарын тыңдап, сайлауалды бағдарламада ауылдық аумақтарды дамытуға қатысты қарастырылған бағыттар туралы ақпарат берді. Жүздесулер өзара пікір алмасу жағдайында өтіп, халықпен тікелей байланыс орнатуға бағытталды.
«Ақ жол» демократиялық партиясы
«Ақ жол» демократиялық партиясының Павлодар облысындағы сайлауалды жұмыстары еңбек ұжымымен кездесумен жалғасты. Партия төрағасы Дания Еспаева азық-түлік өнімдерін өндіретін «Рубиком» ЖШС қызметкерлерімен жүздесіп, партияның сайлауалды бағдарламасының негізгі бағыттарын және Құрылтайда жүзеге асыруды көздейтін ұсыныстарын таныстырды.
Кездесу барысында отандық өндірісті дамыту, кәсіпкерлікті қолдау, бизнеске қолайлы жағдай жасау, еңбек адамдарының мүддесін қорғау және азаматтардың әл-ауқатын арттыру мәселелері қозғалды. Партия төрағасы экономиканы дамытуға бағытталған практикалық шешімдер мен заңнамалық бастамалардың маңызына тоқталды.
«Рубиком» ЖШС қызметкерлері партия өкілдеріне өздерін толғандыратын сұрақтарын қойып, өндіріс пен кәсіпкерлік саласына қатысты ұсыныстарын білдірді. Кездесу ашық пікір алмасу форматында өтіп, еңбек ұжымына партия басшылығымен тікелей диалог жүргізуге мүмкіндік берді.
Партияның үгіт-насихат жұмысында отандық өндіріс, қуатты экономика, кәсіпкерлікті дамыту және азаматтардың мүддесін қорғау мәселелеріне басымдық берілді.
«Respublica» партиясы
«Respublica» партиясының Павлодар облысындағы кезекті сайлауалды кездесуі ірі өндірістік кәсіпорындардың бірі — «ERG Service» АҚ филиалы Павлодар машина жасау зауытында өтті. Партия өкілдері кәсіпорынның еңбек ұжымымен кездесіп, өңірде атқарылған жұмыстар мен сайлауалды бағдарламаның негізгі бағыттарын таныстырды.
Павлодар машина жасау зауыты металл конструкцияларын, әртүрлі технологиялық бағыттағы жүк көтергіш жабдықтарды және заманауи кран техникасын шығаруға маманданған. Кәсіпорында тау-кен, металлургия, мұнай-газ және құрылыс салаларына арналған жабдықтар өндіріледі.
Кездесу барысында партия өкілдері өндірісті дамыту, отандық индустрияны қолдау және еңбек ұжымдарының ел экономикасындағы рөліне қатысты мәселелерге тоқталды. Зауыт қызметкерлеріне партияның сайлауалды бағдарламасында көзделген бағыттар түсіндіріліп, өңірлік деңгейде атқарылған жұмыстар жөнінде ақпарат берілді.
900-ге жуық адам еңбек ететін кәсіпорын ұжымымен жүздесу барысында өндіріс саласының маңызы мен жұмысшы мамандардың отандық өнеркәсіпті дамытудағы үлесі атап өтілді.
***
Жалпы, Павлодар облысында сайлауалды үгіт кезеңі аясында жеті саяси партия да сайлаушылармен тікелей байланысқа басымдық беріп отыр. Бірі өндіріс ұжымдарымен кездесуге ден қойса, енді бірі ауыл тұрғындарымен, ардагерлермен немесе қала жұртшылығымен пікір алмасты. Үгіт жұмыстарының мазмұны әр партияның бағдарламалық ерекшелігіне қарай бөлінгенімен, олардың барлығына ортақ бағыт — сайлауалды ұстанымдарын тұрғындарға таныстыру және азаматтардың пікірін тыңдау.
