Қорғанбек АМАНЖОЛ: Наурыз жыры
Көтеріп моншақ аңғарда,
Көгілжім тартып тауларда,
Шалқытып сағым бауларда,
Наурызым келді бар маңға,
Наурызым келді бар жанға.
Ғажайып сәттер таянды,
Табиғат сергіп оянды.
Көзіме кесте тартылып,
Көкірек нұрға боянды,
Дүрілдеп дүние оянды.
Аңсарым, асыл Наурызым,
Жағаға біткен жалбызым.
Көз жазып қалып сан жылдар,
Көзайым болған жалғызым –
Армысың, ардақ Наурызым.
Қыдыр Наурызға ерейік,
Нәурізек құсын көрейік.
Бәйшешек гүлін терейік.
Ұлыстың күнін аймалап,
Алтын күрек желін өбейік,
Наурыз көжеде бал ұйып,
Ақ уызға арда жариық.
Семсерді сертпен жаниық.
Наурыздың нұрлы нақышы,
Кәусар тазалық деп таниық.
Қазаққа біткен жерұйық,
Халқыма құтты бол ұйық.
Адалға сақтап қориық.
Наурыздың қыдыр батасын,
Жақсылыққа ғана жориық.
Көгілжім нұрлар қалқыған,
Бусанып дүние балқыған,
Тіршілік толғау толқыған,
Тасқында бүгін толассыз,
Наурыздың күйі шалқыған.
Ұлысым болғай бақтылы,
Ырыздық тұнғай ақтылы.
Патшамыз тұрғай тақтылы.
Шапағат Наурыз шалқытқан,
Алаштың асқай шаттығы!
Қуат АДИС: Ұлыстың ұлы күні
Қыс қыр асып кетті аулақ,
Шығады енді көк қаулап.
Наурыз тойы басталды,
Жерошақта от лаулап.
Жердің тұнық тұнбасы –
Жылт-жылт етті жылғасы.
Жақсылықтың бастауы –
Келді міне, жыл басы!
Жылдан жылы жетті леп,
Күн де нұрын төкті кеп.
Жас желекке ақ құйдық,
«Ақ мол болсын!», – деп тілеп.
Білінгеннен қасқа таң,
Жасады әжем асқа қам.
Жас көшеттен тал егіп,
Бұлақ көзін ашты атам.
Қалғығанда тыныш түн,
Қыдыр кезді қыр үстін.
Татуласты араздар,
Ұлы күні Ұлыстың.
Шырқалғанда ән-дастан,
Жаңғырып тұр таңғы аспан.
«Наурыз көже» қайнайды,
Жеті түрлі дәм қосқан.
Еріп ақ қар – ақ әлем,
Алды бір сәт дала дем.
Асыр салып, ойнаған,
Той қызығы – баламен.
Бәйге алаңын шаң қылып,
Тәмам жұртты таң қылып.
Шын жүйріктер қара үзді,
Шабандарды қалдырып.
Дәл осындай құтты күн,
Шабандоздар шықты кіл.
Көкпар кетті додадан,
Тақымында мықтының.
Жылдың басы – елге құт,
Кетсін бәле жерге еніп.
Алтыбақан тебеді,
Қыз-бозбала тербеліп.
Ақ көл-көсір, асың да…
Молшылық қой, расында.
Ақ батасын берді атам,
Дастарханның басында.
Табиғатпен жарасқан,
Елім осы – бағы асқан.
Ән салып тұр барлығы,
Тамсанып тұр дала, аспан.
Қалмахамбет МҰХАМЕТҚАЛИҰЛЫ: Наурыз келді…
Қылаусыз кешегі қар жүзін,
Айғыздап соңымда қалды ізім.
Тым ыстық көктемім жаныма,
Тыныштық әкелсін Наурызым.
Наурызым әкелсін тыныштық,
Дарысын далама ырыс-құт.
Көңілді жайнатсын гүлдердей,
Сенімді жаратсын құрыш қып.
Жаратсын құрыш қып сенімді,
Жақсылық жайласын көңілді.
Жұлдыздар жарқырап көгімде,
Ұл-қыздар қуантсын елімді.
Тілегі осындай Наурыздың,
Жігерлі жігітке бер тізгін.
Сүйінер ізгілік лебіне,
Сүйкімді сыйымыз бар біздің.
Қылаусыз кешегі қар жүзін,
Айғыздап артымда қалды ізім.
Жайнай бер, гүлденіп көктемім,
Жасай бер түрленіп, Наурызым!
Серік ӘКІРАМҰЛЫ: Наурыз
Келді наурыз, гүл-көктем,
Төгіледі нұр көктен.
Наурызды тойлайды ел,
Шаттық толы дүрмекпен.
Жаңарды бар тіршілік,
Ағаш-талға бүр шығып.
Алтынкүрек желі ескен,
Бәйшешек гүл құлпырып.
Күн менен Түн теңелді,
Дала нұрға бөленді.
Ұлы күні ұлыстың,
Ел ырысқа кенелді.
Берекенің бастауы,
Тілек айтқан жас-кәрі.
Құшақ ашқан құстарға,
Туған елдің аспаны.
Мейіріммен астасқан,
Ізгілікпен достасқан.
Ән шалқытып, күй тартып,
Наурызда ел бас қосқан.
