Ақтоғай ауданындағы №136 сайлау учаскесіне таңертеңнен сайлаушылар келе бастады. Азаматтық таңдауын жасауға асыққан тұрғындардың қатарында еңбек ардагері, тыл еңбеккері Әли Альмяшев те бар. Ғасыр жасына жақындаған ақсақал сайлау учаскесіне алғашқылардың бірі болып келіп, өз таңдауын жасады.
1929 жылы туған Әли Садықұлы саналы ғұмырында елмен бірге талай тарихи кезеңді бастан өткерген аға буын өкілі. Ол соғыс жылдарындағы ауыртпалықты тылдағы қажырлы еңбекпен еңсеруге үлес қосып, кейінгі бейбіт кезеңде де ел игілігі жолында еңбек етті. Бүгінде ардагер қоғамдық өмірден қол үзбей, ел ішіндегі маңызды оқиғаларға белсенді қатысып келеді.
Сайлау учаскесінде дауыс берген Әли ақсақал Қазақстанның жаңару жолындағы қадамына сәттілік тілеп, елдің тыныштығы мен халқымыздың бірлігі бәрінен қымбат екенін атап өтті. Қария кейінгі ұрпақтың ел тағдырына жауапкершілікпен қарап, қоғамдық-саяси өмірге белсенді араласуын маңызды санайды.
Әли Садықұлы үшін сайлауға қатысу — жай ғана қалыптасқан дағды емес, азаматтық жауапкершіліктің көрінісі. Ол бұған дейінгі сайлау науқандарында да өз таңдауын жасап, учаскеге алғашқылардың бірі болып келуді дәстүрге айналдырған. Қазыналы қарияның бұл әрекеті кейінгі буынға азаматтық белсенділіктің, елге деген жанашырлықтың жарқын үлгісіндей.
Талай дәуірдің куәсі болған аға буын өкілінің бүгінгі маңызды қоғамдық-саяси науқаннан шет қалмай, таңмен таласа сайлау учаскесіне келуі де айрықша мәнге ие. Өйткені елдің ертеңіне бейжай қарамау, мемлекет өміріндегі маңызды шешімдерге өз үнін қосу — ұрпақтар сабақтастығын айшықтайтын құндылықтардың бірі.
№136 сайлау учаскесінің өкілдері алғашқы дауыс берушілердің бірі болған Әли Альмяшевке естелік сыйлық табыстап, зор денсаулық, ұзақ ғұмыр, отбасына амандық тіледі.
Ғасырға жуық ғұмыр кешіп келе жатқан еңбек ардагерінің сайлауға белсенді қатысуы — елдік іске деген жауапкершіліктің жасы болмайтынын көрсететін тағылымды көрініс. Әли ақсақалдың азаматтық ұстанымы бүгінгі және келер ұрпаққа «ел тағдырына әр азаматтың дауысы мен таңдауы маңызды» деген өнегені аңғартады.
Aiqara.kz
