Ата тілегі
Қойдың басы алдында
Атам оны алды да,
Кесіп беріп құлақты,
Мені әуелі қуантты.
– Жақсы сөзді құлағың,
Тыңдасын! – деп, шырағым.
Бекке тиді тіл ұшы,
«Тілмар бол» деу – мұнысы.
Көзді ұсынды Асанға:
– Қырағы бол қашанда!
Шай қасығын батырып,
Миын алып ақыры:
«Болыңдар», – деп, – ақылды,
Бәрімізге татырды.
Тазалық
Жуын, жуын,
Жуынсақ,
Қандай жақсы, қуыршақ!
Әйтпегенде, бөпешім,
Кірлеп кеткен екенсің.
Қазір аппақ боласың,
Қуанады мамашың.
Санамақ
Бір үйде он баламыз
Бір-бір жастан арамыз.
Бір жастағы – Біржан.
Екідегіміз – Елжан.
Үштегіміз – Үсен.
Төрттегіміз – Төкен.
Бестегіміз – Бекен.
Алтыдағымыз – Ақан.
Жетідегіміз – Жетен.
Сегіздегіміз – Сәкен.
Тоғыздағымыз – Тойтан.
Ондағымыз – Ойқан.
Жастарымызды қосыңыз,
Қосындысы қанша
Осының?
Өз тілім – өзегім
Тілімде «байлығым»,
Айбарым, айбыным.
Емі де өз тілім
Ұлтсыздық қайғының.
Ұлтшылдық – піріміз,
Ұлтсыздық – мініміз.
Тіл деген – ұлтымыз,
Ұлт деген – тіліміз.
Көзін аш бұлақтың!
Отын жақ шырақтың!
Өзге тіл мың болса,
Өз тілің бір-ақ тіл.
Өзге тіл мың мейлі,
Бәрін де біл мейлі,
Өз тілің білмеген,
Ұлтын да білмейді.
Туған тіл о бастан,
Өзіңе жол ашқан.
Айыр тіл тек қана,
Жыланға жарасқан.
Бабамның пәк тілі –
Арымның ақ туы.
Туымды сатқандар –
Халқымның сатқыны.
Туған тіл – тынысың,
Сарқылмас ырысың.
Тынысың тарылса,
Тірлігің құрысын.
Тіл ісі – ұлы ісің,
Тіліңмен ұлысың.
Жауды да жасқайтын
Қайраулы қылышың.
Бірліктің кепілі,
Тірліктің кепілі,
Қазақтың төл тілі –
Тәуелсіз ел тілі.
Қазағым, орысым,
Елім-құт, қонысың.
Елімнің төл тілін,
Құрметтеу – борышың.
Өзге тіл – өрісің,
Бәріне қол ұсын.
Өз тілің – өзегің,
Өзексіз өлісің.
Сараңдық
Жанындағы көршіге
Үй иесі бір сараң.
Балға сұрап келші деп
Қызметшісін жұмсаған
– Шеге қағып алғалы,
Сұрай келдім балғаны.
«Қандай сылтау айтсам» деп
Сараң көрші ойланды.
Уайым ізі бетке енді
Басын қасып депті: «Енді
Қайтейін, ғапу, ет мені,
Інім алып кеткен-ді»
Қызметшісі келгенде:
– Тапқан екен сылтауды,
Майы кетер деген бе?
Деп қожасы бұрқанды.
– Не сұрасаң әрқашан,
Жоқты айтады қайдағы.
Болмас енді алмасам
Өзіміздің балғаны.
«Көктем гүлдері» кітабынан әзірлеген Әйгерім Солтан.
