15 қараша – Қазақстан Республикасының Ұлттық валюта күні және қаржы жүйесі қызметкерлерінің кәсіби мерекесі.
1993 жылғы 15 қарашада Қазақстан Республикасының ұлттық валютасы – теңге айналымға енгізілді. Бұл тарихи шешім еліміздің экономикалық тәуелсіздігін нығайту жолындағы маңызды қадам болды. Ұлттық валютаның қабылдануы Қазақстанның дербес қаржы-экономикалық саясатын жүргізуіне, банк жүйесін дамытуына және мемлекеттің экономикалық егемендігін қалыптастыруына мүмкіндік берді.
Төл ақшамыз – теңге – халқымыздың тәуелсіздігін, мемлекеттілігін және ұлттық бірегейлігін айқындайтын маңызды құндылықтардың бірі. Алғашқы теңге банкноттарында халқымыздың көрнекті тарихи тұлғалары бейнеленіп, ұлттық мәдениетіміз бен рухани мұрамыз кеңінен дәріптелді.
Тәуелсіздік жылдарында ұлттық валютамыз түрлі экономикалық кезеңдерден өтті. Еліміздің қаржы жүйесі дамып, банк қызметтері жетілдірілді, қолма-қол ақшасыз төлемдер мен цифрлық қаржы технологиялары кеңінен қолданыла бастады. Бүгінде теңге Қазақстан экономикасының ажырамас бөлігіне айналып, күнделікті тұрмысымызда, кәсіпкерлік пен өндірісте, сауда және қызмет көрсету салаларында маңызды рөл атқарып келеді.
Ұлттық валютаның тұрақтылығы мен оған деген сенім – ел экономикасының орнықты дамуының маңызды алғышарттарының бірі. Сондықтан қаржылық сауаттылықты арттыру, қаражатты тиімді пайдалану, жинақ мәдениетін қалыптастыру және отандық экономиканы қолдау – әрбір азамат үшін өзекті міндет.
Бұл мереке қаржы саласында еңбек етіп жүрген мамандардың кәсіби еңбегін бағалауға да мүмкіндік береді. Экономикалық тұрақтылықты қамтамасыз етуге, қаржы жүйесінің сенімді жұмыс істеуіне және халыққа сапалы қызмет көрсетуге үлес қосып жүрген сала қызметкерлерінің еңбегі ерекше құрметке лайық.
Ұлттық валюта күні – еліміздің экономикалық тәуелсіздігін, бірлігі мен болашаққа деген сенімін айшықтайтын айтулы мереке. Теңгеміздің тұғыры берік, еліміздің экономикасы қуатты, тәуелсіздігіміз мәңгі болсын!
Асыл ӘБІШЕВ
