Торайғыров кітапханасында «Қазыналы 100 кітап» атты кітап көрмесі ашылды. Көрме қазақ әдебиетіндегі таңдаулы 100 кітапты анықтауға арналған жалпыұлттық сауалнамасы аясында ұйымдастырылған.
Көрменің ашылуына Павлодар облыстық мәслихатының депутаттары Асылбек Туғанбай, Света Абдраманова қатысып, ұлт руханияты мен ұлттық мәдениетті дамытудың төте жолы кітап оқу мәдениетін қалыптастыру екенін атап өтті.
– Ұлт әдебиетіндегі үздік жүз кітапты анықтау бастамасы өте маңызды әрі дер кезінде қолға алынған жоба деп білемін. Менің ойымша әр қазақ оқуы тиіс кітаптардың алдыңғы қатарында Мұхта Әуезовтің «Абай жолынан» бөлек Ілияс Есенберлиннің «Көшпенділер», Мұхтар Мағауинның «Аласапыран» романдары болуы керек. Ал кейінгі жазушылардан айтар болсақ әр оқырманның қолынан табылып жүрген Ұларбек Нұрғалымның «Дайағашшы», Ақберен Елгезектің «Болмаған балалық шақ» кітаптары да осы жүздіктің ішіне енуі керек, – деді Асылбек Туғанбайұлы.
Кітапхана басшысы Шолпан Шахметова барша қатысушыларға кітапқа деген құрметтері үшін алғысын білдірді.
