Абай – 180 жыл
Қазақ әдебиетінің бастауында тұрған, кемел сөз бен арда ойдың алыбы атанған Абай Құнанбайұлының 180 жылдық мерейлі тойы қарсаңында ұлт руханиятын әс көтеріп, қоғамның мәдени дамуына серпіліс берер іс-шаралар ұйымдастырылуда.
«Абай мұрасы – мәңгілік бағдар». Ертістің Павлодар өңірінде осындай атаумен Абайдың қара сөздері топтастырылған аудио-жинақ жарық көрді. Осыған орай «AMANAT» партиясы Павлодар облыстық филиалының мәжіліс залында тағылымы зор рухани кеш өтті.
Абай шығармаларын нақышына келтіре дыбыстап шыққан белгілі журналист, радио-жүргізуші Елдос Тулеубаев көптен бері көкейінде жатқан ойының жүзеге асқанын осы кеште ағынан жарыла айтып, жиналған қауым алдында қунанышымен бөлісті.
Айта кетелік, идея авторының бұл жоспарына «AMANAT» партиясы Павлодар облыстық филиалы жан-жақты қолдау көрсетті. Аталмыш партияның белсендісі саналатын Елдос Тулеубаев аудио-жинақтың жарық көруіне жәрдем жасап, атсалысқан партияның жергілікті филиалына, қаржылай демеушілік жасаған Жанна Слямоваға, өңделуіне ерекше еңбек сіңірген жергілікті «Halyq radiosy» редакциясының дыбыс режиссері Алтынгүл Омароваға, сонымен бірге, жобаны жүзеге асыру барысында жанашырлық танытқан азаматтарға өз алғысын жеткізді.
Аудио-жинақ – хәкім Абайдың терең мазмұнды қара сөздерін заманауи форматта кең аудиторияға қолжетімді етуге бағытталған мәдени бастама. Бірегей жинақтың таныстырылымы барысында сөз алған азаматтар мұндай жобаның алдағы уақытта жалғасы болуы қажет екенін атап көрсетісті. Сандық технологиялар дәуірлеген бұл кезеңде ұрпақты тәлім мен тағылымға жетелеудің бірден-бір қолжетімді құралы – осы аудио-жинақ.
Туынды авторы кеш барысында аудио-жинақтың алғашқы даналарын қоғамдық үйымдарға, кітапханалар мен білім ордаларына, бұқаралық ақпарат құралдарына табыс етті.
«Айқара» ақпараттық порталының платформасында да аталмыш жинақ орналастырылатынын хабарлаймыз.
Жалпылай алғанда, альфа ұрпақ аталып, өзінің текпен тараған тамыр-құндылығынан қашық кеткен, данасы мен даналығын дұрыс танымай, даңққа жетелер даңғылынан адасқан бүгінгі буынды Абайға алып келу, жалпыадамзаттық және ұлттық құндылықтан сырт айналған кірпияздау қоғамды, оның сана-болмысын Абайға жүгіндіру – есептілік үшін емес, келешек ұрпақтың кесектігі үшін қолға алынған, мәңгілік мұқтаждықтан туған аса қайырлы іс. Абай – бар құндылықтың бастауы, Абай – руханияттың қайнары. Абай – адам боламын деп талпынғанға телегей тәлім сіңірер таптырмас бағдар.
Өкінішке қарай, бүгінгі күні рухани тұрғыдан мешеулік басым болып бара жатқанын да аңғарып отырмыз. Кісілікке қайырар, көркемдікке жетелер, сөйтіп, сезімнің трлі пернелерін дөп басар әдеби әлем мен мәңгілік мұраға деген ұмтылыс пен құлшыныстың деңгейі барынша құлдырады. Бұл – біз қалап немесе тілеп алған тірлік емес, әрине. Сандық технологияның дамуымен қатар келіп жатқан үдеріс. Сана толыспай жатса, сандық технология танымдағы жыртықты жабай алмайтынын уақыт көрсетуде. Міне, осы олқылықтардың орнын толтыруға сеп боларлық жаңа аудио-жинақ көпшіліктің сұранысына ие болады деп ойлаймыз.
