Асыл ӘБІШ
ҚАЗАҚ-ты қалай оқысаң да ҚАЗАҚ!
Бір ағамыз қазақ тілінің «басын жарып, көзін шығарып» бір материал әкелді. Бұл ағамыздың қазақша деп ұсынғаны – Бір ағамыз жайлы жазба. Көз жүгіртіп шықтық. Материалдың басынан соңына дейін кейіпкердің тегі – Садвокасов.
– Неге Садвокасов? – дейміз сол баяғы.
– Бауырым, қазбалап қайтесің. Онда тұрған ештеңе жоқ қой. Ол кісі Ресейде туып-өскен, сол жақта өсіп-өнген қазақ. Сондықтан да Садвокасов.
– Бұлай болмайды, аға. Өзге елде туып-өскені сылтау емес. Қазақ қай жерде де қазақ болып қалуға тиіс. Бұрынғы дәуір бұрынғысымен кетті. Қазір біртіндеп бетіміз бері қарап жатыр. Баспаға бұлай бере алмаймыз. Біз мұның түбірін Сәдуақас деп өзгертерміз енді…
– Жоқ. Өзгертуге болмайды!!! – дейді бәйек болған әлгі ағай. Түрі бізді жеп-жіберердей тура.
P.S. Осындай жағдайлар жиі кездеседі. Джартай-ды Жартай деп, Джакуп-ты Жақып деп, Джартыбай-ды Жартыбай деп өзгерткеніміз үшін қарша бораған қарғыстың астында қалғанымыз естен кетпейді. Ресей немесе өзге елді қойшы, тіпті, осы Қазақ жерінде өсіп-өнгендердің кейбірі тегін «ДЖ…» деп бастап жазбасаң, жер-жебіріңе жетеді!
