4 сәуір күні, сағат 11:00-де Бұқар жырау атындағы әдебиет және өнер музейінде «Ұлттық рухани жаңғыру» ұлттық жобасы аясында ақын, әнші, композитор Иса Байзақовтың 125 жылдығына орай «Дауылды жырдың дүлдүлі – Иса ақын» атты әдеби сазды кеш өтеді.
Іс-шара Иса Байзақовтың шығармашылығын насихаттау, жастар арасында әдебиет пен бейнелеу өнеріне қызығушылықты арттыру, өнердің синтезін көрсету мақсатында ұйымдастырылады.
Әдеби-сазды кеш аясында Қазақстан Жазушылар одағының мүшелері – ақын, жазушы, журналист Ғалымбек Жұматов пен ақын, аудармашы Айбек Оралхан Иса Байзақовтың өмірі мен шығармашылығы туралы сөз қозғап, тың деректермен бөлісетін болады. Өңірімізге белгілі айтыскер ақын Мизан Жұмәлі Иса Байзақовтың көп жерде айтыла бермейтін «Қалқа» әнін орындайды. Дәстүрлі әнші Мағжан Ысқақ ақынның атақты «Желдірмесін» паш етпек. Ал, жас әнші Әміржан Нұрлы Үкілі Ыбырайдың «Қызыл асық» әнін тарту етеді.
Шара барысында Иса Байзақовтың 125 жылдығына орай өткен «Бір сурет – бір өлең» атты қалалық өнер байқауының жеңімпаздары марапатталады. Байқауға 16-20 жас аралығындағы Павлодар қаласының мемлекеттік тілде білім алатын мектеп оқушылары мен студенттері қатысқан болатын.
