Шөмірбай САРИЕВ: Наурыз
Аққулы аспан көктерден,
Құстар ұшып жеткеннен.
Келдің тағы, Наурызым,
Туған елге көктеммен.
Бесігім боп тербесең,
Құшақ жайып жер-көсем.
Келдің тағы, Наурызым,
Аман-есен Елге сен!
Дәстүр-салтты ел екем,
Тассын дәулет берекем.
Төрлет елдің Наурызы,
Той-думаным, мерекем!
Маңдайға біткен екі елі,
Дала қазақ – мекені.
Астанамнан Наурызым,
Алатауға жетеді.
Айналғандай анама,
Сіңген салтым – санама.
Алматымнан Наурызым,
Сапар шегер далама.
Қарбаласта тыныш күн,
Бөлеп алды нұр үстін.
Далам, тауым қарсы алды,
Ұлы күнін ұлыстың!
Далам менің тыңдашы,
Таудай қазақ тұлғасы.
Құтты болсын, Наурызым,
Құтты болсын Жыл басы!
Несіпбек АЙТҰЛЫ: Кел, Наурыз!
Кел, Наурыз!
Наурызым, сары уызым,
Жүдеп едім сен кетіп.
Қайта келдің, байтақ елдің,
Қуанышын селдетіп
Дәстүрімнің, жақсы ырымның
Нышанысың жол етер,
Берекелі көже толы
Қазаныңа не жетер…
Құт мерекем, күткен екем,
Сені көптен шын аңсап.
Маздақтарым, боздақтарым,
Бірге оралды ұран сап.
Сөніп барып, өліп-талып,
Жидым, міне, есімді.
Арғымағым, марғұланым,
Қыл бұраудан шешілді.
Еселенсін, өсе берсін,
Туған елдің мерейі.
Іркілмесін, бүлкілдесін
Бұлбұлдардың көмейі.
Мәңгі жанған, таңды жарған,
Ғажап оттар жасасын!
Елім деген, бөлінбеген,
Азаматтар жасасын!
Күләш АХМЕТОВА: Наурыз тойы
Наурызгүлдер, алыңдар жаңа тыныс,
Наурызкөк құс оралды қанаты ырыс.
Нәзік еді не деген, жарықтық-ай,
Жан мейірімін оятқан жаратылыс.
Ериді екен көкпеңбек тастар тәні,
Еркебұлан көктем ән бастар тағы…
Бірнеше елдің жеріне жетер еді –
Қосып жайса, қазақтың дастарқаны!
Аңсаттырған асыл күй, лағыл шақтар,
Ата жолын ақылды қауым сақтар…
Балалардың қолында – уыс-уыс –
үлпілдеген сап-сары бауырсақтар.
Дастарқанға қоямыз барымызды,
Көршілерге көршілер баруы – ізгі.
Жент сақтаған жеңешем ұсынады
Тостағанмен
Ырым қып сары уызды.
Шайылғандай мұң-кірбің, тозаңдар да,
Жабықпайсың жаныңда наз, ән барда.
Нағыз әжей ойлайды нағыз салтты,
Наурыз көже қайнайды қазандарда.
Шапағатын аямай бұл шақта аспан,
Жадырайды әр адам мұң шақпастан.
Оу, ағайын!
Келіңдер!
Бүгін бізде –
Наурыз көже құрт қатып, бұршақ қосқан.
Келгендерге алғысын жауғызды әже,
Ырыс басы – ол үшін жалғыз меже.
Мол астық пен тоқшылық тілекшісі –
Жеті түрлі дән қосқан наурыз көже.
Ән салыңдар,
Би билеп, шаттаныңдар,
Ұлы күнін ұлыстың атқарыңдар.
Туындасын бұл күні бүкіл өнер,
Жығылмасын бәйгеге шапқан ұлдар.
Наурыз қайтып оралды аты да аңыз.
Сұрамаймыз алғыс та, ақы да біз.
Үй – дастарқан,
Даламыз – сахнамыз,
Ұлы мейрам – Наурызға шақырамыз!
