(Авторлық афоризмдер – 6)
2019 жылғы маусымдағы жазбалар:
Жаңа дүние ескінің жолын қиятындығы жанға батса да, заманға сай болуды үйретеді.
***
Өзің адал болмасаң, өзгені харам көресің.
***
Арқаны терлетіп, өмір деп жүргендерің алдау ғана болып шықпасын.
***
Өткенімнен сабақ алмай, сүрінген жеріме құлаудан қорқамын.
***
Ең табысты байлық көзі – біздің санамыз! Санамен жұмыс жасауды үйренгенде, табысқа жетеріміз сөзсіз…
***
Қоғамдағы келеңсіз жағдайларға құсқым келеді. Себебі, біз сол ортаның балаларымыз.
***
Егер дін ұстанғаны үшін қаржылай көмек көрсетсе, онда құдайсыздар саны күрт төмендейтін бе еді?!
***
Ақылды әйел – құрсағындағы баласымен сөйлесіп, о бастан тәрбиеге баулитын жан.
***
Оймен соғысатын заманда, шет ел фильмдерін тамашалап өз еркімізбен санамыздың улануына жол беріп жатқан жоқпыз ба?!
***
Қателік жасап көрмеген адамдарды аяймын. Себебі, өмірін заңдарға байлап, қызықсыз сүріп жатқан тәрізді.
***
Өскелең ұрпақты қызықтыру үшін, тарихымызға жақсы «пиар» керек шығар.
***
Ұстазы оқушыларына екі бірдей ақ қағаз көрсетті. Бірін көрсетті де, үндемеді. Екіншісіне «мұқият мән беріңдер» деді. Сол екен оқушылар түрлі жауап берді, бірақ бірде-бірінен «бұл баяғыша ақ қағаз» деген нәтиже болған жоқ.
***
Адамның көзі хатты барынша емес, өзі қалағандай етіп оқытады.
***
Өзіңе деген сенімділік, өзгеге сенім тудырады.
***
Халық білімсіз емес, бірақ бойларында тереңдік жоқ. Сол себепті білімдерін қолдана алмай жүр.
***
Кез келген салаға шығармашылық көзқарас керек-ау. Оның жоқтығы өмірдің бояусыздығын ашады.
***
Білім емес, қағаз қуалайтын кезең болып кетті ме, қалай өзі?!
***
Өзіне сенбейтін адам халыққа қалай сенеді?!
***
Ит үріп мазаңды қашырса, сәті келгенде теуіп жібересің…
***
Өмір тауының тағы бір шыңына өрмеледік.
***
Қағаз елінде қағазбен оқып, білімсіз қағазбен қағаз табу үшін жұмыс істеушілер саны көбейеді.
***
Тек қана құлауды ойламай, әрі қарай тұруды ойланған жөн.
***
Көзі ашық адам үрейден қорықпайды.
***
Өзім адасып, өзгелерді де сол жолға бастағым келмейді.
***
Халық барда, біз бармыз!
***
Жолы басталғалы бері бір түзу жолға түспей келеді. Замандастары таныстарының арқасында тегіс жолмен қасынан зулап өтеді. Шаңдарына батып, тежегішті тағы да басып ол қалады.
***
Адам жаны жаңаға құмар болса да, ескінің сапасын жоғары санайды.
***
Көзін жұмып, болашақта ашқысы келетіндерге таңым бар. Себебі, қазірін түземей, әдемі болашақты қалай көрмек?!
(Соңы)
